AMCHEM DON DISAMCHEM FEST - Jan 2011



Natalamchi porob somptanch amchi, Raibondchea bhurgeanchi umed odikuch vadttali. Ek vegllech torechi urba amchea kallzan rigtali. Ani ti mhunttlear amchea Menin Jezuchea porbechi. Dor vorsachea tisrea aitara hi porob zata. He porbechem khaxeleponn mhunttlear Fondveantlea vadeachi porob sodanch don disachi: Poili mhunttlear, aitara dis Igorjent, ani somara vo dusre dis amchea Fondveantlea Ajuda Saibinnichea kopelan. 

Aitara dis festachem mis ami chukoupachem naslem. Ghorcheam ani soiream sangata missak vochonk amkam khup avodttalem punn ghara ietanam mat ami tancho sangat soddun ixttam sangata bhonvonk vetale.

Hea festache khas tin nog bhurgeank chodd umediche asle. Poilo mhunttlear festa dis dongrar football moidanar khell. Dusro mhonttlear Vesperacho Fog (fireworks) zo aitara dis Fondveant kopela laguim zatalo. Ani Tisro mhonttlear Dha Zannacho Tiatr zo somara dis sanjecho zatalo.

Poilea disa festachem jevonn zatoch donparchi Kadamba dongrar footballachi match astali. Khellamcho mog titlo naslelean anv sodanch oxiram pautalom. Ani kednam ti kabar zai xi zatali. Ganvche zantte, danddge toxech bhurgue dongor choddon hi match pollounk ietale.

Punn amchea bhurgueaponnar hatuntle don nog amkam khupuch avod’ttale ani te polloupak ami khupuch nettan ani umedin bhoron ravo. Poilo mhunttlear fog. Team disamnim fog  marop subeiz assonaslem. Khuincheai ganvan festam assa thoimch fogacho avaz gaztalo. Sokallim fuddem ghornal zale ki amkam tea ganvan fest assa mhun gomtalem.

Vorsavllicho ho fog vesper ani sermanv zalea uprant lokachi umed vaddoitalo. Bhurgim sermavank assonv vo nam assonv, fog mhunttlear jevonn khan soddun Kopela laguim ubuim zatalim. Muzgachea kumpasar ho fog ganvchea lokachi urba vaddoitalo. Hea fogantle thodde nog mhonttlear, voir nai-ii (missiles) soddop ani voir pautoch tantuntlean neketram tunttun zomni vattean dhanvon eta tim dissop. Dusre ghornal. Tea bhair fungotteo. Punn chod avddichem mhunttlear kombiechim tantiam. Fog-er (Firework contractor) don madank sutli (jute rope) bandhun don rongancheo kombio  lamboun dovortale. Bhurgeam modem poilemch tharaupachem astalem: tuji kombi koslea rongachi! Ani uprant khoimchea rongachi kombi chodd tantiam dita tem mezop!. Choddxe fog-er ho sogleanche avddicho nog nimanno dovortale. Tea vellar oslo fog khup komi zaguear zalelean xezarchea ganvcho lokui thoim khupuch distalo.

Fog zalea uprant ami dusre disachea festache toiarek lagtale. To dis feriad naslelean mis sokaim fuddem 7:30 vaztam suru zatalem. Punn hea disachi khas umed mhonttlear Dha zannacho tiatr. Tiatr sanje punn sokallim mis zatanch tiatrachi jeral (final) essai pollounk ami ghara vocho nastanam thoim hajri laitale. Ganvche kolakar songitkaram sangata aplim kantaranchi essai martale. Aikolam tea pormonnem, dha zannacho tiatr adim fokot tin ganvanim zatalo, ek Ribandar, dusro Brittona, ani tisro Pomburpa. Kaim vorsa bollandlim ho poromporik tiatr Brittona ani Pomburpa bondh zala ani fokot Ribandar Fondveant kopelachea festa disa zata. Halinch hea tiatrachim 100 vorsam monoil’lleam. Tedna tiatr khup unne aslelean amkam tachi khupuch voddvik asli ani hea fuddem sodanch asteli.

Hea tiatrachem khas mhonttlear tachi mukhi dhakoun – poromporik Hymn (opening scene). Devache sumurticher boroilolo Hymn pollounk sabar ganvcho lok ekttoutalo. Te dhormik dakhounnenk utram bosoupi tor amcho Mestiri ani halinche kallar Luis Vicente ani tacho bhau Doming Vicente, tor bhumika korpi ganvche lhan vhoddle artist. Hymnachi dakhoun odik rongin korunk amchea ugdassan khup bhor gheun kam korpi mhunttlear Maurice Fernandes, Milagres Fernandes ani Joaquim Leitao. Vaddeantle bhurgei tankam zaito tenko ditale. Vaddeache sogle tiatrist ekponnan ho tiatr bore bhaxen kortale. Kantoristanche vattent sorgest Roque Frois amchea kallzant sodanch jivo urtolo.

Tea kallar cheddvam zobor pallkar bhumika korinaslim tednam chedde cheddvam nesson ostorechi bhumika kortale. Mojea ugdassan cheddvam nestale te mhonttlear Doming Vicente ani Tony Cardoz.  Dogui ostorechi bhumika bori soboitale punn cheddvache bhumikent Tony ekdom boro utortalo. Pod’dea fattlean vochon, cheddvachi bhumika korteleachem nanv sodun kaddunk amchi tozvit choltali ani tannem aplem nanv sanglea bogor parkunk khup avgodd zatalem.

Kaim vorsam uprant amchea vaddeachea tiatran commercial tiatran nespi nottieo ostorechi bhumika korunk lagleo ani hea nettan ho tiatr anikui ful’lo. Hea tiatran poilinch cheddvam dixtti podlim tim Assumptin, Diana, Jesse, Succorin de Sanguem, Marina, Querobina Carvalho, adi.

Hea tiatrachi anink ek khas khobor munttlear, ho tiatr funkott astalo. Boskechi vevostha sodanch don bhaganim astali. Machie fuddem mhunnchem muzg monddoli fattlean xendreo (mats) astaleo. Hea xendreamcher avoieo dhakttea bhurgeank gheun ani zanttim paiem soddun bhostalim. Ani tache fattlean bank (wooden long seat without back) ghaltale. Hea bankacher gharantlim vhoddlim ani festak eilelim soirim bostalim.

He bank ghalpak ek pod’dhot asli. Tiatr funkott munttoch, dor eka gharantle vhoddil, ek suman poilim, tiatrachea zagear, apnnank bank ghalunk, zago addaun dovortale. To zago sodanch ek maan (bamboo stick) vo boddi vo pid’do (from coconut leaf) ghalun sugur kortale. Zata title fuddem bossonk mellchem ho husko astalo. Disak tin pautti, mhunnchem sokall, donparam ani sanjer vochon ti suat sugur assa ani dusro konnuch mhojea uprant ieun mukhar pavonk nam hachi khatri korunk zai zali. Ani hakach lagon zaiti bhasabhas zatali. Ani kestanv chodd zait tor vo apunn chodd fattim podla zalear konnui eklo sonvara ratcho modianir ieun tea sogllea maanink vo boddiank ani pid’ddeank uzo ghaltalo ani dusre disa apnnachi maan fuddem ghalun vetalo. Uprant tiatra dis portun kestavam astalim.

Punn him kestamvam tiatr suru zai porian choltalim ani ek pautt tiatr suru zalea uprant sogle xantponnim tiatr polloitale. Bossonk ghatlele bank voir sokol aslelean mottvea munxeank gomtti vhoir kaddun tiatr pollouncho poddtalo. Oxe toren dusre disk kaim zannache manin vollon (neck sprain) ietalem. Lamb asleleancher fattlean than zaite pautt fatorui podttale. Toxench zantti ani bhurguim xendreamcher bosleam thoim thonddi lagta mhunn angavellean kamurchem gheun nidleam ti dison ietalim. Fantodd zalea bogor tiatr somponaslo. Ani teach barabhor amchem festui somptalem.

Dha zannancho tiatr azun chalu assa punn atam temp bodol’la. Te poder mele ani te unddei guele. Mani, bod’dieo ani pid’dde atam nanch; atam chear panch zann ektthaim zaun kodeli (chairs) ghaltat ani kodelimchem bhaddem sutta toxi dhorin boska ditat. Adle bhaxen atam boskek lagon bhasabhas zainam ani kodelamchi unchi ekuch aslelean sogleank bore bhaxen tiatr pollounk meuta. Punn tiatrachea kestanvanim ji mouza astali ti atam nam.  Atam sogleanchea ghoranim sofa ani plastic kodeli zalea – bankui moddon guelea.  Adleo lhan lhan vostu, vorsachea-vorsa tiatrak ghoddleleo ghoddneo ganvchea lokak voros bhor ulounk melltaleo, tevui nam zalam.  Novem zaitem ailam, punn adleo ruchik iadi porneam dissancho ugdass kossoch soddinam.

Michael (Micky) Fernandes

Prev Next