Amkam SANTA Meulo



by Micheal Fernandes
 
Guelea vorsachi khobor hi. Dezembracho kall aslelean, khupuch thondi poddleli. Sogleak eta-veta thoim Natalam-chim bikbiktim neketram distalim. Gharamnim toxemch lokachea ghaddianim Natalamchim gitam gaztalim.  Lhan bhurgeanim ghorachea bolkavanim tambdde mei lamboun dovorlele. Natal Pai rati vellar ietolo ani aplea meianim Natalancheo bhetto ditolo tem polloupak doian tel ghalun rautalim. Xekim 25 tarik aili ani tancho usko mekllo zalo. Lhan khupuch khoxi tor matxim vaddlelim aplea monam sarkem mellonknam mhunn matxe dukhi aslim.
 
 
Natalamchea kallar ghara-gharanim soiream daireank bhett diunk chodduch gorjechem.  Choddxim poilea disa ami khuimch vochonam punn durea disa bhett diunk ami bhair sorta. 
 
Mhozo ek khas ixtt amchea xezarchea ganvan vosti korpi.  Taka bhettunk tachea ghora vochop mhunttlear mojea jivar ietalem. Hachem karann mhunttlear,  tachea ghora bhonvtim ghaddianchi khupuch gordi astali. Tachea ghorakodden ghaddi ubi korunk unnem mhunttlear, ordhem hor suvat sodunk bhonvadde marche podttale. Ani noxiban meuli tor, tum nam to polleun, dusre apli ghaddi tuje ghaddie pattlean vo mukhlean dhovrun vochot mhunn bhirant astali.  Ak’kem voros bhor nimit dhorun tanguer vocho nastanam ravlo zalearui, Natalanchea kallar oichench podttalem.
 
 
Monan hench gunngunnun, laguinch suvat mevonk rezar korit ami bhair sorlim. Panch minut-anchi vatt punn luttun luttun veta mhunttlear paunnevor sorlem. Punn ixttalea thoim pautanch laguinch eka durga mukhar ghaddi ghalpa itli ugtti suvat assa ti polleun Devan amchim magnnem aikolem mhunn argam diunk vego-veg ghaddi tea ugttea khavttean rigoili ani ami khoxecho suskar soddlo. 
 
Amkam polleun ixtt khup khuxeal zalo.  Gharant bhitor sortanch amchim bhurgim tanchea bhurgeam vangdda rokdinch gull zalim ani khinnam bitor varandan khellunk laglim. Ixttache ghorkarnin Natalancho kunsvar kelolo munttoch neureo, dodol, kormolam ani bebinc travessant ghalunt mezar kadlelem aslem. Amkam ilem gharant kelelem naka sokoileim adlem. Aili poili gozal korta mhunttlear vell khuincheanuch gelo tachi khobor passun koll'linam.
 
Vochpacho niall monan ietanch amcho usko amche ghaddieacher guelo.  Dusro konnui amchi ghaddi addait mhunn ami bhurgeank chol veguim iea mhunn bhair kaddlim. Buildingachi lift apoili tor tantuntlean ek Natlanchim  gitam gaupi (Carolers) pongodd eilo ani samkarachea ghoran bhitor sorlo. Tich lift dorun ami sokol denvlim.
 
 
Sokoll ieun pollelear kitem? Amche ghaddie pattlean ek ghaddi ubi asli. Gaddie laguim konnunch nam. Fattlean fuddleanui pollelear konnuch nodrek disonaslo. Ghaddiechea mukhailea arxea pattlean ek mobile number dash board-ar dovorla to dislo. Konnank tor ghaddi kaddunk zai zalear apnnank phone korchea khatir number dovortat – oxi chal zaleli assa. Zaum Saiba munn to mobile number ami dial korunk suru kelo.  Zalear kitem? Phone vazta pun konn uklinam. Tin chear pautt phone kortoch konnem tori phone ubharlo ani apunn rokddoch ietam oxem sanglem. Rauta rauta amchi tokli chodd gorom zali. Itlean konn posskotte ani tambddem nesson ieta to dislo. Voddli dhu umedin nachonk mhunnonk lagli, “Dadda, here comes Santa Claus”. Dhaktti dhuv gondollak sampoddli. Tinnem mhunttlem, “ Dadda, but why is he walking? He should come on a sleigh!”  Tankam kitem zabab diuncho hem chinta mhunossor tho 'Walking Santa Claus' amchea fuddeant eilo ani “Sorry, I blocked your car” oxem mhunnon samkarche ghaddient boslo ani zzzuppp korun ghaddi mukhar gheun guelo ani nanch zalo. Amchi vat ugtti zali pun amchi bhurguim mat polloit urlim. 
 
Atam hea vorsa 'ami poilinch ixttager hea' mhunn bhurgim fattik lagleam. Kiteak gai mhunn vicharlear sangtat, 'amkam tinga “Walking Santa Claus” melltolo ani amkam zai tem ami tache kodchean ghetelim'.
 
 

Prev Next